Për Programet e Studimit të Ciklit të Parë që përfundojnë me Bachelor (B.Sc.) në:
1. LABORANT MJEKËSOR
2. FIZIOTERAPI

Për Programin e Studimit të Ciklit të Dytë që përfundon me Master Profesional (MP) në:
1. INFERMIERISTIKË KLINIKE

Për Programin e Studimit të Ciklit të Dytë që përfundon me Master i Shkencave (M.Sc.) në:
1. MENAXHIM DHE VEPRIMTARI SHËNDETËSORE

Këshilli i Akreditimit, pasi shqyrtoi propozimet për hapjen e Programeve të reja të studimit, Bachelor, Master Profesional dhe Master i Shkencave, të kërkuar nga Shkolla e Lartë Universitare Private “Medikadent”, bazuar në raportet e vlerësimit teknik dhe në përmbajtje, raportimin e Agjencisë Publike të Akreditimit të Arsimit të Lartë për procedurën e vlerësimit dhe respektimin e kritereve si edhe bazuar në standardet shtetërore të cilësisë, arrin në këtë përfundim:

1. Përmbajtja e Programit të ri të studimit, Bachelor në “Laborant Mjekësor”, përmbush pjesërisht standardet e cilësisë dhe për këtë arsye vendos kushtet e mëposhtme, pas plotësimit dhe verifikimit të të cilave jep vlerësimin përfundimtar:
Kushtet:
 Të paraqitet një studim real i tregut dhe synimet strategjike të zhvillimit ekonomik kombëtar.
 Të paraqiten bashkëpunime me institucione të tjera.
 Të sillen CV e personelit akademik.
 Të paraqiten kontratat e bashkëpunimet me institucione të tjera.
 Të paraqiten të dhëna për ambjentet që institucioni vendos në dispozicion të studentëve.

2. Përmbajtja e Programit të ri të studimit, Bachelor në “Fizioterapi”, përmbush pjesërisht standardet e cilësisë dhe për këtë arsye vendos kushtet e mëposhtëm, pas plotësimit dhe verifikimit të të cilit jep vlerësimin përfundimtar:
Kushtet:
 Të paraqiten bashkëpunime me institucione të tjera.
 Të sillen CV e personelit akademik.
 Të paraqiten kontratat e bashkëpunimet me institucione të tjera.
 Të paraqiten të dhëna për ambjentet që institucioni vendos në dispozicion të studentëve.
 Të plotësohet informacioni për pedagogët dhe strukturat ndihmëse në staf apo infrastrukturë, me qellim që të bëhet një vlerësim i plotë i të gjithë komponentëve: kurrikul, staf akademik, infrastrukturë dhe staf ndihmës.

3. Përmbajtja e Programit të ri të studimit, Master Profesional në “Infermieristikë Klinike”, përmbush pjesërisht standardet e cilësisë dhe për këtë arsye vendos kushtet e mëposhtme, pas plotësimit dhe verifikimit të të cilave jep vlerësimin përfundimtar:
Kushtet:
 Të paraqiten objektivat kryesorë në fushën e infermieristikës klinike dhe pjesë specifike e cila do të bënte të mundur diferencimin e një diplome Master Profesional i cili në parim ka dhënien e njohurive jo më të përgjithshme por specifike për fusha specifike mjekësore.
 Të përshtaten lëndët/modulet duke mos u përsëritur me lëndët/modulet e diplomës bachelor
 Të përshtaten lëndët/modulet me formimin që duhet të kenë këta specialist dhe të jenë për drejtime më specifike ku infermierët do mund të punojnë.
 Të përshtaten lëndët/modulet në mënyrë të tillë që përveç informacionit që ato tejçojnë ti bëjnë studentët të aftë për të bërë kërkime dhe shfletojnë edhe literaturën bashkëkohore.
 Të sillen CV e personelit akademik.
 Të paraqiten kontratat e bashkëpunimet me institucione të tjera.

4. Përmbajtja e Programit të ri të studimit, Master i Shkencave në “Menaxhim dhe Veprimtari shëndetësore”, nuk përmbush standardet e cilësisë dhe për këtë arsye jep vlerësimin Negativ, me argumentet e mëposhtëm:
 Mungojnë të dhënat për përgjegjësin e programit të studimit.
 Nuk është paraqitur pedagogu i lëndës “E Drejta e punës”.
 Nuk përputhet ngarkesa në ECTS/orë mësimore të paraqitur në syllabuse me ngarkesën e paraqitur në planin mësimor.
 Pedagogët kanë një ngarkesë të lartë duke mbuluar shumë lëndë mësimore.

Këshilli i Akreditimit, bazuar në kompetencën që i jep Ligji Nr 9741, datë 21.5.2007, Për Arsimin e Lartë në Republikën e Shqipërisë, i ndryshuar, Vendim Nr.424, datë 02.6.2010 “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë” dhe Vendim Nr.368, datë 14.4.2011 “Për disa shtesa dhe ndryshime në Vendimin Nr. 424, Datë 2.6.2010, të Këshillit të Ministrave “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë”, të ndryshuar”, i rekomandon Ministrit të Arsimit dhe të Shkencës:

Programi i Studimit: Master i Shkencave në Menaxhim dhe Veprimtari shëndetësore
të mos hapet

Institucioni aplikues, Shkolla e Lartë Universitare Private “Medikadent”, për programet e studimit: Bachelor në “Laborant Mjekësor”, Bachelor në “Fizioterapi” dhe Master Profesional në “Infermieristikë Klinike”, pasi të ketë plotësuar kushtet e mësipërme për secilin program studimi, të njoftojë zyrtarisht Këshillin e Akreditimit, i cili, pas verifikimit, do të rifillojë procedurën për vlerësimin e programeve të mësipërme.

Z. Vladimir Nika nuk ishte i pranishëm në mbledhje.