Për akreditimin Institucional dhe Programeve të Studimit që përfundojnë me “Bachelor Ekonomi, me profile: Financë-Bankë dhe Kontabilitet; Administrim Biznesi; Biznes dhe Ligj”; “Bachelor Marrëdhënie Ndërkombëtare/ Diplomaci”; “Bachelor Shkenca Politike – Administratë publike, me profile: Administratë publike; Shkenca Politike”, të Institucionit “Shkolla e Lartë Private Mesdhetare e Shqipërisë”.
Këshilli i Akreditimit, pasi shqyrtoi vlerësimin Institucional dhe Programeve të Studimit që përfundojnë me “Bachelor Ekonomi, me profile: Financë-Bankë dhe Kontabilitet; Administrim Biznesi; Biznes dhe Ligj”; “Bachelor Marrëdhënie Ndërkombëtare/ Diplomaci”; “Bachelor Shkenca Politike – Administratë publike, me profile: Administratë publike; Shkenca Politike”, të Institucionit “Shkolla e Lartë Private Mesdhetare e Shqipërisë”, të kryer në periudhën Dhjetor 2011, mbështetur në raportin e vetëvlerësimit, raportin e vlerësimit të jashtëm, në raportimin e Agjencisë Publike të Akreditimit të Arsimit të Lartë, jep vlerësimin përfundimtar Pozitiv, pasi janë në përputhje me standardet, kërkesat ligjore institucionale dhe akademike në fuqi.
Këshilli i Akreditimit vëren se në përgjithësi Institucioni dhe programet e studimit, i kanë përmbushur objektivat e tyre formues, por kanë edhe disa mangësi në realizimin tërësor dhe me cilësi të procesit të formimit të studentëve dhe pajisjes së tyre me dijet dhe shprehitë e nevojshme dhe për këtë qëllim
REKOMANDON:
Për Institucionin “Shkolla e Lartë Private Mesdhetare e Shqipërisë”.
Të shtohet personeli akademik me kohë të plotë, në përputhje me standardet shtetërore të cilësisë (së paku 70% e personelit akademik të jetë i punësuar me kohë të plotë).
Të konsolidohen njësitë e brendshme administrative.
Të shikohet mundësia për të përfshirë studentët në kërkimin shkencor.
Të parashikohen plane zhvillimi në mënyrë që të përballohet konkurrenca në rritje e tregut privat të arsimit të lartë.
Të hartohen strategji për rekrutimin e studentëve.
Për programin e studimit “Bachelor Shkenca Politike – Administratë publike, me profile: Administratë publike; Shkenca Politike”.
Përmirësimi dhe azhornimi i programit të studimit dhe profileve të tij të kryhen në vazhdimësi, duke u bazuar në literaturat më bashkëkohore dhe të autorëve të njohur të vendit dhe botërorë.
Të shikohet mundësia e rritjes së numrit të pedagogëve me kohë të plotë, të rekrutohen personel akademik me tituj/grada shkencore përkatëse dhe të bashkëpunohet me pedagogët aktualë (të cilët në një periudhe 1-3 vjeçare të jenë pajisur me tituj/grada shkencore).
Të përfshihen në planin mësimor për këtë program studimi, të paktën dy lëndë me zgjedhje për çdo profil.
Të parashikohen mënyra për të tërhequr student të rinj dhe me rezultate të larta.
Për programin e studimit “Bachelor Marrëdhënie Ndërkombëtare/ Diplomaci”
Të shikohet mundësia që në planin mësimor të këtij programi studimi, të zgjerohet lista e lëndëve me zgjedhje.
Të pasurohet bibloteka me tituj dhe autorë me një identitet shkencor të konsoliduar.
Të vendoset si kriter specifik për pranimin e studentëve, gjuha e huaj angleze.
Të synohet rekrutimi i personelit akademik me kohë të plotë dhe të pjesshme, në favor të të parëve.
Të synohet rritja e nivelit të bashkëpunimit me grupet e interesit dhe sektorin publik.
Të synohet rritja e debatit shkencor në shkallë institucioni dhe në rang vendi.
Për programin e studimit “Bachelor Ekonomi, me profile: Financë-Bankë dhe Kontabilitet; Administrim Biznesi; Biznes dhe Ligj”.
Të përfshihet në planin mësimor edhe një lëndë me zgjedhje për vitin e parë dhe të dytë, për profilet Financë-Bankë dhe Kontabilitet; Administrim Biznesi.
Të shikohet mundësia që për profilet: Financë-Bankë dhe Kontabilitet; Administrim Biznesi, në vitin e tretë të studimeve, të shtohen disiplina siç janë “Kontrolli i brendshëm” dhe “Auditimi në shërbimet e sigurisë”.
Per profilin Biznes dhe ligj, të shikohet mundësia për të zgjeruar disi më tej aspektin e trajtimit të ligjeve e rregullave duke përfshirë në mënyrë më të zgjeruar, çështjet e falimentimit, legjislacionin në funksionimin e entiteteve në industritë e rregulluara, me përfshirjen e këtyre tematikave në studimet e ciklit të dytë.
Të parashikohen plane zhvillimi në mënyrë që të përballohet konkurenca në rritje e tregut privat të arsimit të lartë.
Këshilli i Akreditimit, bazuar në kompetencën që i jep Ligji Nr 9741, datë 21.5.2007, Për Arsimin e Lartë në Republikën e Shqipërisë, i ndryshuar, Vendim Nr.424, datë 02.6.2010 “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë” dhe Vendim Nr.368, datë 14.4.2011 “Për disa shtesa dhe ndryshime në Vendimin Nr. 424, Datë 2.6.2010, të Këshillit të Ministrave “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë”, të ndryshuar”, i rekomandon Ministrit të Arsimit dhe të Shkencës:
Akreditimin Institucional të Institucionit “Shkolla e Lartë Private Mesdhetare e Shqipërisë”.
Programi i Studimit: Bachelor Ekonomi, me profile:
a. Financë-Bankë dhe Kontabilitet
b. Administrim Biznesi
c. Biznes dhe Ligj
të akreditohet.
Programi i Studimit: Bachelor Marrëdhënie Ndërkombëtare/ Diplomaci
të akreditohet.
Programi i Studimit: Bachelor Shkenca Politike – Administratë publike, me profile:
a. Administratë publike
b. Shkenca Politike
të akreditohet.
Zj. Anila Hoda dhe Z. Ilir Bozgo nuk ishin të pranishëm në këtë mbledhje.