Në datat 14-16 Nëntor, u mbajt në Universitetin e Tuentes, Hollandë, Forumi Evropian i Sigurimit të Cilësisë, në të cilin morën pjesë Znj. Majlinda Demirneli, Përgjegjëse e Sektorit të Promovimit dhe Vlërsimit të Cilësisë dhe Znj. Pranvera Dingo, Përgjegjëse e Sektorit të Financës dhe Shërbimeve Mbështetëse.

Forumi kishte si temë diskutimi “Rritja e arsimit, kërkimit dhe angazhimit social përmes sigurimit të cilësisë”. Në këtë forum u diskutua mbi politikat e reja, metodologjitë inovatore dhe instrumentat që mund të sigurojnë një qasje holistike ndaj cilësisë dhe sigurimit të cilësisë në institucionet e arsimit të lartë dhe lidhjen e tyre me Agjencitë e sigurimit të cilësisë, instrumentat se si sigurimi i cilësisë mund të përmbushë nevojat dhe sfidat që dalin nga ndërlidhja e agjencive të sigurimit të cilësisë me misionin e tretë të universiteteve, etj. Gjithashtu, në këtë forum u zhvilluan sesione të ndryshme rreth perspektivave, politikave dhe tendencave, kërkimeve dhe shembujve praktikë të rasteve që lidhen me zhvillimit aktual në sigurimin e cilësisë, si dhe ndërlidhjen e të gjithë aktorëve me njëri tjetrin me anë të sigurimit të cilësisë.