KËSHILLI I AKREDITIMIT
VENDIM
Nr. 319, datë 16.03.2012

Për Programet e Studimit të Ciklit të Parë që përfundojnë me Bachelor (B.Sc.) në:
1. ANGLISHT
2. DIZAJN
3. FIZIOTERAPI
4. SHKENCA JURIDIKE

Këshilli i Akreditimit, pasi shqyrtoi propozimin për hapjen e Programeve të reja të studimit, të kërkuar nga “Albanian University”, Filiali Berat, bazuar në raportet e vlerësimit teknik dhe në përmbajtje, raportimin e Agjencisë Publike të Akreditimit të Arsimit të Lartë për procedurën e vlerësimit dhe respektimin e kritereve si edhe bazuar në standardet shtetërore të cilësisë, arrin në këtë përfundim:

1. Përmbajtja e Programit të ri të studimit, Bachelor në “Anglisht”, përmbush standardet e cilësisë dhe për këtë arsye jep vlerësimin Pozitiv, me sugjerimet:

• Të paraqitet lista e personelit akademik me kohe të plotë ose me kohë të pjesshme.
• Të plotësohet lista e personelit akademik me gradë shkencore Dr, pasi pjesa më e madhe e pedagogëve janë me master dhe lëndë të rëndësishme si “Gjuhësi e Përgjithshme” të mbulohet patjetër me pedagogë me përvojë.
• Të rritet numri i personelit akademik të brendshëm dhe të jashtëm, pasi ka të tillë të cilët janë të mbingarkuar, si psh Z. Bledar Kurti mbulon shumë lëndë si: “Anglishte e folur”, “Histori arti”, “Analize teksti”, “Shkrim krijues”, “Anglishte e biznesit”, “Histori e kulturës anglo amerikane” dhe “Analizë teksti 2”.
• Të plotësohen syllabuset e lëndëve me literaturë të detyruar dhe ndihmëse dhe jo me cikle leksionesh si në rastin e syllabusit të lëndës “Leksikologji”.
• Të krijohen bashkëpunime me institucione të njohura brenda dhe jashtë vendit, sidomos me Departamentin e Gjuhës Angleze, në Fakultetin e Gjuhëve të Huaja.
• Të sillen të dhëna për kriteret e pranimit të studentëve në këtë program pasi pretendohet të nxirren përkthyes, specialist të medias, punonjës administrate dhe të organizatave ndërkombëtare.

2. Përmbajtja e Programit të ri të studimit, Bachelor në “Dizajn”, përmbush standardet e cilësisë dhe për këtë arsye jep vlerësimin Pozitiv.

3. Përmbajtja e Programit të ri të studimit, Bachelor në “Fizioterapi”, përmbush standardet e cilësisë dhe për këtë arsye jep vlerësimin Pozitiv, me sugjerimet:

• Të plotësohet informacioni për pedagogët dhe strukturat ndihmëse në staf apo infrastrukturë, me qëllim të mund të bëhet një vlerësim i plotë i të gjithë komponentëve.
• Të paraqitet literature e detyruar në të gjithë lëndët/modulet.

4. Përmbajtja e Programit të ri të studimit, Bachelor në “Shkenca Juridike”, përmbush standardet e cilësisë dhe për këtë arsye jep vlerësimin Pozitiv.

Këshilli i Akreditimit, bazuar në kompetencën që i jep Ligji Nr 9741, datë 21.5.2007, Për Arsimin e Lartë në Republikën e Shqipërisë, i ndryshuar, Vendim Nr.424, datë 02.6.2010 “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë” dhe Vendim Nr.368, datë 14.4.2011 “Për disa shtesa dhe ndryshime në Vendimin Nr. 424, Datë 2.6.2010, të Këshillit të Ministrave “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë”, të ndryshuar”, i rekomandon Ministrit të Arsimit dhe të Shkencës:

1. Programi i Studimit: Bachelor në Anglisht të hapet
2. Programi i Studimit: Bachelor në Dizajn të hapet
3. Programi i Studimit: Bachelor në Fizioterapi të hapet
4. Programi i Studimit: Bachelor në Shkenca Juridike të hapet