Këshilli i Akreditimit, bazuar në Ligjin Nr. 9741, datë 21.05.2007, “Për arsimin e lartë në Republikën e Shqipërisë”, i ndryshuar, Vendimin Nr. 424, datë 02.06.2010 “Për miratimin e rregullores për sistemin e akreditimit, organizimin dhe veprimtarinë e institucioneve të sigurimit të jashtëm të cilësisë” i ndryshuar, dhe mbështetur në procedurën e ndjekur nga APAAL, raportin e vlerësimit të brendshëm dhe të jashtëm si dhe dokumentacionin mbështetës, për programin e studimit, me elementët si më poshtë:

Emërtimi i programit: Bachelor në “Administrim Biznesi”
Cikli i studimit: Cikli i parë
Vendimi i hapjes/licencimit: Vendim i Këshillit të Ministrave Nr.357, datë 12.05.2010 dhe Urdhër i riorganizimit i Ministrisë së Arsimit dhe Shkencës Nr. 360, datë 02.09.2013
Institucioni që e ofron:Shkolla Private e Arsimit të Lartë “Universiteti Metropolitan Tirana”
Fakulteti përgjegjës: Fakulteti i Ekonomisë
Kohëzgjatja (Vite/semestra): 3 Vite / 6 Semestra
Kredite (ECTS): 180 Kredite
Forma e studimi: Me kohë të plotë
Gjuha e studimeve: Shqip
Niveli i diplomës në kuadrin e Kornizës Shqiptare të kualifikimeve: Niveli 6


Programi i studimit Bachelor në “Administrim Biznesi” i përmbush “Standardet shtetërore të cilësisë” për akreditimin e programit të studimit të ciklit të parë si dhe kërkesat ligjore akademike.
Mbështetur në gjithë sa më sipër, Këshilli i Akreditimit vendos të japë për këtë program studimi vlerësim pozitiv.  
Këshilli i Akreditimit i rekomandon Ministrit të Arsimit dhe Sportit që, programi i studimit, Bachelor në “Administrim Biznesi” me elementët e mësipërm, të akreditohet.
Institucioni duhet të marrë masa që të plotësojë rekomandimin si më poshtë:

• Të përmirësohen mekanizmat e vlerësimit të brendshëm të cilësisë duke angazhuar dhe vetë stafin e brendshëm në proceset e vlerësimit dhe përmirësimin e programeve lëndore në përmbajtje.
• Të krijohen mundësi që personeli akademik të mbështetet për kërkim shkencor.