Për akreditimin e Programeve të Studimit që përfundojnë me Master Profesional në “Mësuesi”; Master Profesional në “Qeverisje e koorportave”; Master i Shkencave në “Informatikë Ekonomike, me profile: Financë dhe Bankë; Administrim Biznesi” dhe Master i Shkencave në “Psikologji, me profile: Psikologji Këshillimi; Psikologji Shkollore”, të “Universiteti Europian i Tiranës”.

 

Këshilli i Akreditimit, pasi shqyrtoi vlerësimin e Programeve të Studimit që përfundojnë me Master Profesional në “Mësuesi”; Master Profesional në “Qeverisje e koorportave”; Master i Shkencave në “Informatikë Ekonomike, me profile: Financë dhe Bankë; Administrim Biznesi” dhe Master i Shkencave në “Psikologji, me profile: Psikologji Këshillimi; Psikologji Shkollore”, të “Universiteti Europian i Tiranës”, të mbështetur në raportin e vetëvlerësimit, raportin e vlerësimit të jashtëm, në raportimin e Agjencisë Publike të Akreditimit të Arsimit të Lartë, jep vlerësimin përfundimtar Pozitiv, pasi janë në përputhje me standardet, kërkesat ligjore institucionale dhe akademike në fuqi.

 

Këshilli i Akreditimit vëren se në përgjithësi programet e studimit, i përmbushin objektivat formues, por kanë edhe disa mangësi në realizimin tërësor dhe me cilësi të procesit të formimit të studentëve dhe pajisjes së tyre me dijet dhe shprehitë e nevojshme dhe për këtë qëllim

 

REKOMANDON:

Për programin e studimit Master Profesional “Mësuesi”

• Të rritet numri i personelit akademik efektive për të siguruar sa më mirë procesin e udhëheqjes së mikrotezave në rast se numri i studentëve do të jetë më i madh se aktualisht.
• Të bëhen përpjekje për të shtuar titujt dhe gradat shkencore të personelit akademike efektivë.

 

Për programin e studimit Master Profesional në “Qeverisje e koorportave”

• Të bëhet përpjekje për të rritur numrin e studentëve në këtë program studimi.
• Të bëhen përpjekje për të plotësuar hapësirën boshe të krijuar nga largimi i profesoratit të huaj si rezultat i mbylljes së projektit.

§  Të pasurohet bibloteka e Institucionit, me literaturën e specializuar në fushën e këtij programi studimi.

 

Për programin e studimit Master i Shkencave në “Informatikë Ekonomike, me profile: Financë dhe Bankë; Administrim Biznesi”

• Të realizohen studime tregu bazuar në metoda dhe instrumenta të provuara për të identifikuar pritshmëritë e punëdhënësve për aftësitë që studentët duhet të zotërojnë në përfundim të studimeve në programin e studimit Master Shkencor në Informatikë Ekonomike.
• Të krijohen mekanizma për nxitjen dhe përfshirjen e studentëve në mënyrë individuale ose në bashkëpunim me pedagogët në kërkime të mirëfillta shkencore.
• Të implementohet një sistem i qendërzuar për automatizimin e menaxhimit të studentëve dhe personelit.
• Të pasurohet faqja e internetit me të dhëna mbi proçesin dhe rezultatet e akreditimit të institucionit dhe programeve mësimore.  

 

Për programin e studimit Master i shkencave në “Psikologji, me profile: Psikologji Këshillimi; Psikologji Shkollore”

• Të realizohet përfshirja e studentëve në veprimtari kërkimore shkencore.
• Të realizohet një studim i plote i tregut të punës në terren për rëndësinë dhe zhvillimin e programeve të studimit në nivel Master i Shkencave.

 

Këshilli i Akreditimit, bazuar në kompetencën që i jep Ligji Nr 9741, datë 21.5.2007, Për Arsimin e Lartë në Republikën e Shqipërisë, i ndryshuar, Vendim Nr.424, datë 02.6.2010 “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë” dhe Vendim Nr.368, datë 14.4.2011 “Për disa shtesa dhe ndryshime në Vendimin Nr. 424, Datë 2.6.2010, të Këshillit të Ministrave “Për Miratimin e Rregullores për Sistemin e Akreditimit, Organizimin dhe Veprimtarinë e Institucioneve të Sigurimit të Jashtëm të Cilësisë”, të ndryshuar”, i rekomandon Ministrit të Arsimit dhe të Shkencës:

 

Programi i Studimit:                          Master Profesional në “Mësuesi”

të akreditohet.

 

Programi i Studimit:                          Master Profesional në “Qeverisje e koorportave”

të akreditohet.
 

Programi i Studimit:                          Master i Shkencave në “Informatikë Ekonomike”, me profile:

a.    Financë dhe Bankë

b.    Administrim Biznesi

të akreditohet.

 

Programi i Studimit:                          Master i Shkencave në “Psikologji”, me profile:

a.    Psikologji Këshillimi

b.    Psikologji Shkollore

të akreditohet.